Rannsóknir og þróun

Héraðs- og Austurlandsskógar eru beinir þátttakendur og styrktaraðilar í mörgum rannsóknum sem fara fram að hluta eða öllu leiti á starfssvæði verkefnisins. Ýmsar plöntu og kvæmisrannsóknir eru staðsettar á Austurlandi og eru þær flestar unnar í samstarfi við Mógilsá, rannsóknarstöð Skógræktar ríkisins, sem og einstaka masters- og doktorsnema í náttúrufræðum, skógrækt, líffræði o.s.frv.

Þessar rannsóknir eru flestar unnar til langs tíma eða þrjú ár eða lengur. Margar eru studdar af þriðja aðila s.s. af Rannís eða öðrum rannsóknarsjóðum. Árið 2004 voru meðal annars settar út tvær nýjar kvæmatilraunir í Ösp og Rauðgreni.

Rannsóknarverkefni á milli Héraðs- og Austurlandsskóga og Rannsóknastöðvar Skógræktar ríkisins, Mógilsá var undirritað í lok árs 2006.
Verkefnið fjallar um Sögu gróðurfars, skóga og umhverfis á Héraði síðustu 2000 árin.
Rannsóknastöð skógræktar ríkisins á Mógilsá hefur nýlega hafið þátttöku í fjölþjóðlegu rannsóknarverkefni sem nefnist: “Vitnisburður setlaga úr Lagarfljóti um bræðsluvatnssögu Vatnajökuls og umhverfisbreytingar á Héraði”.  Þátttakendur verkefnisins eru meðal annars Háskólinn í Lundi í Svíþjóð og Háskóli Íslands.
Aðkoma Skógræktar ríkisins og Héraðsskóga að verkefninu mun tengist sögu gróðurfars og umhverfisbreytinga á Héraði. Markmiðið er að kortleggja gróðurfarsögu svæðisins frá því fyrir landnám til dagsins í dag (síðustu 2000 árin) með frjókornagreiningu, en setlög Lagarfljóts varðveita frjókorn sem greina má til tegunda. Þannig má fá fram sögu gróðurfars og skóga (breytingar á  skógarþekju) langt aftur í aldir. Einnig verða vistfræðilegar breytingar kannaðar í kjölfar landnáms og þróun þeirra fram til okkar daga.
Rannsókn þessi mun einnig fela í sér lestur ritaðra heimilda sem tengjast lýsingum á gróðurfari, veðurfari og hamförum, meðal annars áhrifum Öskjugosins frá 1875 og fleiri eldgosa á gróðurfar og mannlíf Héraðsbúa.